Таласта «Ты супер! Кыргызстан» долбоорунун кастинги өттү

25-апрелде Талас драма театрында «Ты супер! Кыргызстан» аттуу балдардын вокалдык долбооруна кастинг болуп өттү. Ага Талас районунан 80ден ашык бала катышты.

Буга чейин кастинг Караколдо жана Нарында өткөн. Бүгүнкү күндө долбоордун командасы оор турмуштук кырдаалга туш болгон 300гө жакын таланттуу балдарды сынактан өткөрдү.

Көпчүлүк катышуучулар үчүн бул — кесипкөй калыстар тобунун алдында биринчи жолу сахнага чыгуу жана «Ты супер! Кыргызстан» теледолбооруна катышууга жасалган маанилүү кадам.

Таластагы тандоо туру өлкө боюнча өтүп жаткан чоң кастингдин бир бөлүгү болду. Тандоо уланууда. Кийинки кастинг 28-апрелде Баткенде өтөт, андан кийин долбоордун командасы өлкөнүн башка аймактарын кыдырат. Эң ири тандоо Бишкекте өтөрү күтүлүүдө.

«Ты супер! Кыргызстан» — бул өз үнүн угузууну каалаган балдар үчүн сынак. Сынакка 7ден 18 жашка чейинки, турмуштагы кыйынчылыктарды жеңип, кыялдарына умтулган балдар катыша алышат.

Долбоор тууралуу жаңылыктар жана маалыматтар «Номад ТВ» каналында, анын расмий сайтында жана «Ты супер! Кыргызстан» шоусунун социалдык тармактарында жарыяланып турат.