"Чалдыбар" чек ара көзөмөлүнүн көзөмөлдөөчүсү 21 килограмм гашиш менен кармалды

Мамлекеттик баңгизатка каршы күрөшүү башкармалыгы тарабынан жүргүзүлгөн операцияда чек ара кызматкеринин үйүнөн 21 кг 321 гр гашиш табылды. "Чалдыбар" чек ара көзөмөлүнүн көзөмөлдөөчүсү Кара-Балта шаарынын тургуну, 25 жаштагы Т.Энин үйүн тинтүү учурунда гашиш баңгизаты чыккан. Бул боюнча баңгизатка каршы күрөшүү кызматы бүгүн, 17-декабрда билдирди. "Көзөмөлдөөчүнүн үйүн тинтүүдө спорт баштыгында 50 даана пресстелген түрдөгү 21 килограмм 321 грамм гашиш табылды"- деп башкармалыктан кабарлашты. Баңгизатка каршы күрөшүү башкармалыгынан кабарлагандай, бул укук коргоо органдарынын кызматкерлеринен баңгизат кармалган төртүнчү факт. Буга чейин Тажикстандын Ички иштер министринин кызматкери 6 килограмм героин, Чүй облустук ички иштер башкармалыгынын кызматкери 1,24 грамм гашиш жана жаза аткаруу мамлекеттик кызматынын көзөмөлдөөчүсү 131 грамм апийим менен кармалган. Учурда оперативдүү изилдөө иш-чаралары жүргүзүлүүдө.

Автор: Айдай Асанбекова