Оштун губернатору: "УКМК эмне, өзүнчө мамлекетсиңерби?"

Президенттин Ош облусундагы өкүлү Аманкан Кенжебаев УКМКнын Ноокат башкармалыгынын жетекчисинин жыйынга келбегенине ачууланды.

Кенжебаевге Ноокат шаарынын тургундары менен болгон жолугушууда калаа мэри менчиктештирилип кеткен муниципалдык жерди ала алышпай жатканын айтып, тиешелүү арыз УКМКга берилгенин билдирди.

Губернатор бул боюнча атайын кызматтын Ноокат башкармалыгынын башчысынан жооп алайын деген учурда, ал чогулушта жок болуп чыкты. Ачууланган Кенжебаев УКМКнын кызматкерине кайрылып, жетекчисине айткандарын жеткирүүнү тапшырды.

"Жетекчиңерге айтып койгула, арызын жазып кызматтан кете берсин. Мен бүгүн сунуш берем. УКМК эмне, өзүнчө мамлекетсиңерби? Мен азыр чыгарым менен чалам. Биз бул жакка ойноп келген жерибиз жок. Ар бир мамлекеттик кызматтын жетекчилери ушул жерде отурушат. Бул жакта элдин маселеси турат",- деди ал.