Барда токмоктолгонун айткан кыз... Ошто кылдат тергөөнү талап кылган окуя катталды

Ош шаардык милициясы токмоктолгонун айтып, президенттен үй сураган 28 жаштагы кыздын окуясы боюнча маалымат таратты.

Маалыматка караганда, курбу кыздар 19-майга караган түнү "Эне-Сай" ресто-барында спирт ичимдигин ичишип, 9 миң сом карыз болуп калышкан. Бирок алар акчаны төлөбөстөн ызы-чуу салышкан. Мындан улам күзөтчүлөр курбуларды бардан чыгарып коюшкан.

Арыздануучу ресто-бардын имаратынын алдындагы жолго жатып алган. Түнкү саат 03:20да ага бир кыз келген. Ал сүйлөп баштаганда жолдо жатканы аны тээп жиберген. Ага жооп кылган кыз (өздүгү тактала элек) арыздануучуну бетке тепкен. Мунун баары баштан-аяк видеобайкоого түшүп калган.

Деген менен 28 жаштагы кыз милицияга күзөтчүлөр урганын айтып кайрылган. Текшерүү иши башталып, арыз ээси жана күбөлөр суракка алынышкан. Кызга карата соттук-медициналык экспертиза дайындалган.

Автор: Кылымбек Бейшеев