Коомдук жайларда ыдык көрсөткөн жарандарга жаза колдонуу сунушталууда

Кыргызстанда коомдук жайларда ыдык көрсөткөн жарандарга карата жаза колдонуу тууралуу мыйзам долбоору коомдук талкууга коюлду. Аталган мыйзам долбоорун Жогорку Кеңештин депутаты Азизбек Абдуллаев демилгелеген.

Документке ылайык, Кылмыш-жаза кодексин жана Укук бузуулар кодексин жаңы беренелер менен толуктоо сунушталууда.

Укук бузуулар кодексине төмөнкүдөй өзгөртүү киргизүү сунушталып жатат.

109-4-берене. Ыдык

Коомдук жайларда ыдык көрсөтүү, башка адамдын кадыр-баркына шек келтирген жана кемсинткен жагдайды жараткан аракеттер үчүн – жеке жактарга 200 эсептик көрсөткүч өлчөмүндө айып салууга же үч суткадан жети суткага чейин камакка алууга алып келет.

Ошондой эле Кылмыш-жаза кодексине өзгөртүү киргизүү сунушталууда.

158-1-берене. Ыдык

Мурда жоопкерчиликке тартылган адам тарабынан бир жыл ичинде ыдык көрсөтүү кайталанып жасалса, эки жылдан төрт жылга чейинки мөөнөткө эркиндигинен ажыратууга жазаланат.

Документтин негиздемесинде азыркы учурда коомдук жайларда жана башка коомдук мамилелер чөйрөлөрүндө жасалган ыдык көрсөтүүгө байланыштуу жарандардын кайрылуулары орун алып жатканы белгиленген.

Автор: Айжанар Рыспек кызы
Фото: интернеттен алынды