Ошто акча алмаштыруучу жайдын ээсине кол салган жаран кармалды

Ош шаарындагы Амир-Тимур көчөсүндө жайгашкан акча алмаштыруу жайында катталган кандуу окуя боюнча бүгүн, 25-майда шаардык милициядан маалымат беришти.

Маалым болгондой, кечээ, 24-май күнү белгисиз жаран аталган жайдын ээси, 1992-жылы туулган М.Хга бычак менен кол салды. Жабырлануучу Ош шаардык ооруканасына жеткирилип, бирок операция учурунда каза болгону кошумчаланды.

Ал эми кол салууга шектүү катары 1988-жылы туулган Т.Н. аттуу жаран кармалды.

Милициянын маалыматына караганда, шектүү окуядан кийин ал жерден акча алып чыгып кеткен. Учурда адам өлтүрүү беренеси менен кылмыш иши козголуп, тергөө жүрүп жатат.

Каза болгон жарандын артында 3 баласы калды. Ал акча алмаштыруучу жайды быйыл февралдан бери иштетип келе жаткан.

Автор: Замира Ниязбекова