Бишкектеги мектепте ата-энелерден миллион сомдон ашык акча чогултулганы аныкталды

Бишкектеги №24 мектепте мыйзамсыз акча чогултуу фактысы аныкталды. Бул тууралуу Башкы прокуратура кабарлады.

Маалымдалгандай, мектептин кызматкерлери тарабынан окуучулардын ата-энелеринен мектепти оңдоп-түзөөдөн өткөрүү үчүн мыйзамсыз 1 миллион 131 миң 450 сом чогултулган. Акчанын бир бөлүгү билим берүү мекемесинин кызматкеринин жашаган жеринде сакталгандыгы аныкталган.

Аталган факт боюнча Кылмыш-жаза кодексинин 337-беренеси (Кызмат абалын кыянаттык менен пайдалануу) менен кылмыш иши козголуп, учурда тергөө иштери жүргүзүлүүдө.

Автор: Кылымбек Бейшеев