Индияда окуу борборунан өрт чыгып, кеминде 15 адам каза болду

Индиянын Лакхнау шаарында үч кабаттуу коммерциялык имаратта чыккан ири өрттүн кесепетинен кеминде 15 адам каза болду. Бул тууралуу 22-июнда "The New Indian Express" басылмасы кабарлады.

Маалыматка ылайык, анда анимация боюнча окуу борбору, китепкана жана 3D-графика студиясы жайгашкан. Каза болгондордун көбү студенттер экени айтылууда. Дагы беш адам жаракат алып, ооруканага жеткирилди.

"Биз окуя болгон жерге келгенде имараттан коюу түтүн чыгып жатканын көрдүк. Беш-алты адамды куткарууга жетиштик. Өрт башталганда бир адам дүрбөлөңгө түшүп, терезеден секирип кеткендиктен оор жаракат алды. Имараттын ичинде дагы эле адамдар бар",- деген күбөлөрдүн бири "Asian News International" агенттигине.

Жабыркагандарга жетүү үчүн куткаруучулар имараттын арткы дубалын бузууга аргасыз болушкан. Айрым студенттер жалындан качып, экинчи кабаттагы даараткана бөлмөлөрүнө бекинип алышкан.

Автор: Айжанар Рыспек кызы
Фото: интернеттен алынды