Франция Иракты жеңип, плей-оффко мөөнөтүнөн мурда чыкты

Франциянын футбол боюнча улуттук курамасы 2026-жылдагы Дүйнө чемпиондугунун тайпалык баскычынын экинчи турунда Иракты 3:0 эсебинде жеңип, мөөнөтүнөн мурда плей-оффко чыгууга жолдомо алды.

Беттеш АКШнын Филадельфия шаарында өтүп, Дүйнө чемпиондугунун тарыхындагы өзгөчө оюндардын бири болуп калды. Анткени бул беттеш биринчи жолу аба ырайынын кескин бузулушуна байланыштуу убактылуу токтотулду. Катуу жааган жамгыр жана чагылган себеп болуп, оюнчулар биринчи таймдан кийин кийим алмаштыруучу жайга кетишкен. Оюн эки сааттан кийин гана кайра уланды.

Франция эсепти 14-мүнөттө ачты. Чабуулчу Килиан Мбаппе айып аянтчасынын сыртынан таамай сокку узатып, командасын алдыга чыгарды. Ал эми 26-мүнөттө Ирактын негизги оюнчусу Аймен Хусейн жаракат алып, оюнду уланта алган жок. Андан кийин демилге толугу менен француздардын колуна өттү.

Экинчи таймда Франция дагы эки гол киргизди. 54-мүнөттө Мбаппе эсепти 2:0 кылып, Дүйнө чемпионаттарындагы өзүнүн 16-голун жаратты. Ал эми 66-мүнөттө Усман Дембеле Майкл Олизенин чыгарып берген пасын ийгиликтүү жыйынтыктап, оюндагы акыркы эсепти белгиледи.

Бул жеңиштен кийин Франция 6 упай топтоп, тайпадан чыгарын расмий камсыздады. Ал эми Ирак курамасынын кийинки баскычка өтүү мүмкүнчүлүгү дээрлик калбай калды.

Автор: Максуда Кудайбердиева