Хьюстондо өзбек күйөрмандары чоң майрам уюштурушту

Өзбекстан менен Португалиянын беттешинин алдында АКШнын Хьюстон шаарында миңдеген өзбекстандыктар чогулуп, улуттук майрамга айланган өзгөчө атмосфера жаратышты.

Күйөрмандар палоо жана улуттук тамак-аштарды даярдап, ыр-бий уюштуруп, өлкө курама командасына колдоо көрсөтүштү. Өзбекстандын желектери желбиреп, улуттук музыка жаңырып турган аянтча бир күнгө кичинекей Ташкентти элестетти.

Дүйнөнүн кайсы бурчунда жашабасын, өзбекстандыктарды мекенге болгон сүйүү жана улуттук курамага болгон колдоо бириктирип турганын бул жолку иш-чара дагы бир жолу далилдеди.

Автор: Айзада Кыдырмышева