Кыргызстанда маркетинг тармагын өнүктүрүүгө багытталган Кыргыз маркетинг ассоциациясы түзүлдү

23-июнда Бишкек шаарында Кыргыз маркетинг ассоциациясынын биринчи жалпы жыйыны өтүп, уюм расмий түрдө ишин баштады. Жыйынга ассоциациянын негиздөөчүлөрү жана мүчөлүккө өтүп, добуш берүү укугуна ээ болгон маркетинг адистери катышты.

Ассоциациянын негизги максаты - маркетинг тармагында глобалдык деңгээлге жооп берген жергиликтүү адистерди даярдоо. Бул багытта уюм үч негизги ишмердүүлүккө басым жасайт:

Жергиликтүү жана чет элдик эксперттердин ортосунда тажрыйба алмашуу жана иш-чараларды уюштуруу;
Кыргызстандагы маркетинг рыногу тууралуу маалыматтарды чогултуу жана Ассоциация мүчөлөрүнө жеткирүү;
Билим берүү жана илим министрлиги менен биргеликте колледждердин жана жогорку окуу жайлардын программаларын кайра карап чыгууга катышуу.

Жыйындын жүрүшүндө Айдай Мокушева ассоциациянын төрайымы болуп шайланды. "Бул мен үчүн чоң жоопкерчилик жана ишеним. Биз ассоциацияны жөн гана расмий уюм эмес, адистерди бириктирген жана маркетинг тармагын өнүктүргөн аянтча катары түзүп жатабыз. Кыргызстанда маркетингди өнүктүрүү үчүн тажрыйба алмашуу, изилдөөлөрдү жүргүзүү, билим берүүнү жакшыртуу жана кесиптик стандарттарды өркүндөтүү маанилүү. Ошондой эле бизнес, мамлекет жана билим берүү тармагынын өкүлдөрүнүн ортосундагы кызматташтыкты чыңдоого өзгөчө көңүл бурабыз",- деди Мокушева.

Ошондой эле директорлук кызматка Нурсултан Бакыт дайындалды. "Биз глобалдык деңгээлге жооп берген маркетологдорду калыптандыруу багытында баратабыз. Биз миссиябызды жана алгачкы үч жылга стратегияны түзүп, аны системдүү ишке ашырабыз. Ассоциация түзүлгөндөн тартып эле демилгени күчтүү адистер колдоп, өз убактысын, энергиясын жана ресурстарын жумшоого даяр экенин көрсөтүштү. Биз үчүн бизнес менен маркетологдордун ортосунда өз ара түшүнүшүү жана баалуулукту жогорулатуу маанилүү",- деп билдирди Нурсултан Бакыт.

Мындан тышкары, Координациялык кеңешке тармактагы 19 адис кирди. Алар: Тимур Аралбаев, Руслан Гайдаров, Айбек Жангазиев, Элнура Жолдошева , Мээрим Дүйшеева, Айбек Куренкеев, Сергей Макаров, Ассоль Өмүркулова , Дарья Стасилевич, Рузали Токмергенова, Наиль Хайбулин, Бурул Бектур, Нурай Бакасова, Бермет Жеңишбекова, Дастан Азимжанов, Чыңгыз Мамбетшаев, Данияр Урманбетов, Айкөл Доктурбек кызы.

Бул уюмдун түзүлүшүнө салым кошкон алгачкы 50 мүчөсүнө ыраазычылык катары “негиздөөчү мүчө” деген атайын статус ыйгарылды. КМАнын түзүлүшү Борбор Азиядагы кесипкөй коомчулук тарабынан да колдоого алынып, Казакстан жана Өзбекстандын маркетинг ассоциацияларынан куттуктоолор келип түштү.

Автор: Меерим Кабылова