Аптаптуу ысыкта ден соолукту кантип сактоо керек? Дарыгерден кеңеш

Жай мезгилинин эң ысык күндөрү башталганда күндүн түз нуру адамдын ден соолугуна олуттуу коркунуч жаратышы мүмкүн. Өзгөчө абанын температурасы кескин көтөрүлгөн учурларда күн алдында көпкө жүрүү күн өтүүгө, организмдеги суунун азайышына жана башка кооптуу абалдарга алып келет. Адистер мындай учурларда этият болуп, жөнөкөй коопсуздук эрежелерин сактоо өтө маанилүү экенин эскертишет.

Дарыгерлердин айтымында, күн өтүү ар кандай деңгээлде болушу мүмкүн. Алгачкы белгилери байкалганда эле чара көрүү оор кесепеттердин алдын алууга жардам берет. Эң оор – үчүнчү деңгээлде адамдын абалы кескин начарлап, башы айланып, айлана-чөйрөнү жакшы байкай албай калат. Айрым учурларда көзүнө ар кандай элестер көрүнүп, денеси тырышып, ал тургай эсин жоготушу мүмкүн.

Мындай абал адамдын өмүрүнө коркунуч жаратышы мүмкүн болгондуктан, дароо медициналык жардамга кайрылуу зарыл.

Адистер күндүн зыяндуу таасиринен сактануу үчүн төмөнкү эрежелерди сактоону сунушташат:

Териге аба өткөргөн, жука жана табигый кездемеден тигилген кийимдерди кийиңиз. Зыгыр, пахта жана жибек сыяктуу материалдар ысыкта өзгөчө ыңгайлуу.
Башыңызды сөзсүз ачык түстөгү жеңил баш кийим менен жаап жүрүңүз. Бул күндүн түз нурларынан коргонууга жардам берет.
Бетти жана башты мезгил-мезгили менен муздак суу менен жууп туруу же кол чатыр колдонуу пайдалуу.
Организм суусуз калбашы үчүн күнү бою жетиштүү өлчөмдө таза суу ичиңиз.
Алкоголдук ичимдиктерден алыс болуңуз. Алар организмди тез суусуздандырып, ысыктын терс таасирин күчөтөт.
Саат 11:00дөн 16:00гө чейин күндүн нуру эң күчтүү болгондуктан, мүмкүн болушунча түз күндүн алдында жүрбөңүз. Зарыл болсо көлөкөдө болууга аракет кылыңыз.
Коомдук транспорт менен жүргөндө эл аз болгон убакытты же ыңгайлуу маршруттарды тандаңыз. Жолдо дененин ачык жерлерин нымдуу салфетка менен сүртүп, бат-баттан суу ичип туруңуз.

Дарыгерлер ысык аба ырайында өзгөчө балдарга, улгайган адамдарга, кош бойлуу аялдарга жана өнөкөт оорулары бар жарандарга өзгөчө көңүл буруу керектигин белгилешет. Алар күндүн ысыгына эң сезимтал топтордун катарына кирет.

Адистердин айтымында, жөнөкөй сактык чараларын сактоо күн өтүүнүн жана ысыктан улам пайда болгон ден соолук көйгөйлөрүнүн алдын алууга жардам берет. Өзүңүзгө жана жакындарыңызга кам көрүп, аптаптуу күндөрдө ден соолугуңузду коргоону унутпаңыз.

Автор: Замира Ниязбекова