Садыр Жапаров жергиликтүү бийлик өкүлдөрүн Ысык-Көлдүн жээгине чогултту. Себеби

Бүгүн, 30-июнда президент Садыр Жапаров Ысык-Көл облусунун Чолпон-Ата шаарында облустардагы ыйгарым укуктуу өкүлдөрүн, Бишкек жана Ош шаарларынын мэрлерин, укук коргоо жана сот органдарынын жетекчилерин чогултуп, республикалык кеңешме өткөрдү.

Президенттин басма сөз кызматы билдиргендей, мамлекет башчысы элдин негизги көйгөйлөрү – ичүүчү суу, жол, ирригация, жер маселеси жана муниципалдык кызматтар сыяктуу маселелер борборго жетпей эле жеринде чечилиши керектигин белгиледи. Анын айтымында, жоопкерчиликти бири-бирине түртүп, маселелерди айлап-жылдап создуктурууга жол берилбейт.

“Жоопкерчиликти бир мекемеден башкасына, бир жетекчиден экинчисине түртүп, убакыт өткөргөн мезгил бүттү. Элге шылтоо эмес, мыйзамдуу жана өз убагында кабыл алынган адилеттүү чечим керек. Эл силерди издеп, мекеме эшиктерин каккылап, зар какшагандан кийин гана иштей баштаган систем да бүтүшү керек. "Асмандан жылдыз алып бергиле” деген жери жок”,- деди президент.

Мамлекет башчысы жергиликтүү бийлик өкүлдөрү эл менен үзгүлтүксүз жолугушуп, көйгөйлөрдү алдын ала аныктап, ыкчам чечүүгө тийиш экенин айтты. Ошондой эле облустагы өкүлдөрдүн, акимдердин жана мэрлердин ыйгарым укуктары кеңейтилгенин белгилеп, алар өз аймагындагы мамлекеттик саясаттын аткарылышы үчүн жеке жоопкерчилик тартарын билдирди.

Мамлекет башчысы мамлекеттик башкаруу жаатында кабыл алынган бир нече чечимдерди санап өттү:

• Айыл башчыларына муниципалдык кызматчы макамын берүү боюнча мыйзам кабыл алынды;
• Президенттин облустардагы ыйгарым укуктуу өкүлдөрүн, акимдерди жана мэрлерди жылына эки жолудан кем эмес калк менен жолугушууларды өткөрүүгө милдеттендирген мыйзам Жогорку Кеңеш тарабынан кабыл алынды.
• Ошондой эле президенттин жарлыгы менен саясий мамлекеттик кызмат орундарын ээлеген адамдарды, тактап айтканда акимдерди, алардын орун басарларын, мэрлерди жана айыл өкмөт башчыларын тең же төмөн турган кызмат орундарына үч жумуш күнүнүн ичинде конкурстан өткөрбөстөн дайындоо тартиби киргизилди. Бул чечим мамлекеттик башкарууда кадрдык дайындоолордун ыкчамдыгын камсыз кылууга багытталды.
• Мындан ары облустардагы ыйгарым укуктуу өкүлдөр облустук түзүмдөрдүн, анын ичинде күч түзүмдөрүнүн жетекчилерин дайындоодо түздөн-түз аралашат. Башкача айтканда, мындай дайындоолор алардын макулдугу менен ишке ашат.
• Ошондой эле негиздүү сунуш берилген учурларда облус жетекчиси, район акими облустук түзүмдөрдүн, анын ичинде күч түзүмдөрүнүн жетекчилерин кызматтан бошотууга макулдук берет. Мындай укук республикалык жана облустук маанидеги шаарлардын мэрлерине да берилет.
• Ал эми райондун акимдери министрликтер менен административдик ведомстволордун, алардын ведомстволук түзүмдөрүнүн райондук башкармалык бөлүмдөрүнүн жетекчилерин дайындоого макулдук беришет.

Жыйындын соңунда Садыр Жапаров жетекчилерди бюрократиядан алыс болуп, бир команда катары иштөөгө чакырып, жыл аягында аткарылган иштер боюнча кайрадан кеңейтилген жыйын өткөрүлөрүн билдиргени маалыматта кошумчаланды.