Орусиялык ырчы Стас Михайлов Караколдогу Ыйык Троицк чиркөөсүнө барды (видео)

Орусиянын Эл артисти Стас Михайлов Каракол шаарына болгон сапарынын алкагында Кыргызстандагы эң эски православдык храмдардын бири саналган Ыйык Троицк чиркөөсүнө барды. XIX кылымдын аягында курулган бул храм архитектуралык эстелик болуп эсептелет. Анда Тихвин кудай энесинин иконасынын көчүрмөсү сакталат.

Чиркөөнүн башчысы Алексей белгилүү ырчыга храмдын тарыхы тууралуу айтып берип, анын жер титирөөдөн кийин сакталып калганы, совет мезгилинде жабылып, кийин кайра жанданганы тууралуу маалымат берди.

Стас Михайлов храмдын ички жасалгасы менен таанышып, шам жагып, жылуу кабыл алуу үчүн ыраазычылык билдирди.

Белгилей кетсек, бүгүн, 1-июлда кечинде ырчы Каракол шаарынын күнүнө арналган майрамдык концерттин башкы коногу болот. Ал "Город 312" тобу менен бирге Чыңгыз Айтматов атындагы борбордук аянтта концерт берет. Иш-чара саат 18:00дө башталып, бардык каалоочулар үчүн акысыз болот.