Ошто 1,6 килограмм баңгизат табылып, шектүүлөр кармалышты

Ош облусунун аймагында 1,6 килограмм баңгизат табылып, шектүүлөр кармалышты.

Облустук милицияга М., аттуу жаран баңгизат менен алектенип жүрөт деген маалымат түшкөн. Анын негизинде шектүү М., Кара-Суу районунун аймагынан 44,36 граммды түзгөн кара-күрөң түстөгү зат менен кармалган.

Ал жаран Аравандын тургуну С., аттуу жарандан сатып алгандыгы боюнча көрсөтмө берген. Анын үйүнө тинтүү жүргүзүлгөндө өзүнүн айдоо жеринде бекитип койгон 3 даана таңгак, өзгөчө жыты бар кара кочкул түстөгү зат табылып алынган.

Экспертизанын корутундусунун негизинде 1 килограмм 611 граммды түзгөн гашиш баңги каражаты деп аныкталып чыккан.

Аталган факт боюнча Кылмыш-жаза кодексинин 282-беренеси (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) боюнча кылмыш иши козголгон.

Кармалган жарандар 2 айга тергөө абагына камалышты.

Автор: Айжанар Рыспек кызы
Фото: Ош ОИИБ