Орусиядагы Wildberries кампасында дрондун чабуулунан 24 адам жабыркады

Москва облусунун Электросталь шаарында жайгашкан Wildberries кампасында дрондун чабуулунан өрт чыгып, 24 адам жабыркады. Кыргызстандын Орусиядагы элчилиги алардын арасында кыргызстандыктар бар-жогун тактап жатат.

Дипломатиялык өкүлчүлүктүн кызматкерлери аталган кампа объектисинде эмгектенген кыргыз жарандары менен жолугушту. Зарыл консулдук-укуктук жардам көрсөтүлүүдө.

Өрт толугу менен өчүрүлө элек, кампанын аймагы курчоого алынган. Окуя болгон жерде Орусиянын Өзгөчө кырдаалдар министрлигинин, өрт өчүрүү-куткаруу кызматтарынын жана башка тийиштүү органдардын кызматкерлери иштешүүдө.

Орусиялык массалык маалымат каражаттарынын билдирүүсүнө ылайык, өрт учкучсуз учкуч аппараттарынын чабуулунан кийин чыккан. Өрттүн расмий себептери Орусиянын ыйгарым укуктуу органдары тарабынан аныкталууда.

Элчиликтин кызматкерлери кырдаалдын өнүгүшүн көзөмөлдөөнү улантууда.

Автор: Айжанар Рыспек кызы
Фото: интернеттен алынды