Кыргызстандын футбол боюнча олимпиадалык курамасы Азия оюндарында А тайпасында ойнойт

Бүгүн, 23-июль күнү футбол боюнча XX жайкы Азия оюндарындагы таймаштардын чүчү кулагы өтүп, Кыргызстандын олимпиадалык курамасынын атаандаштары белгилүү болду.

Кыргыз футбол биримдиги билдиргендей, анын жыйынтыгы боюнча Кыргызстандын курама командасы А тайпасында орун алып, Япония, Таиланд жана Гонконг курамалары менен беттешет. Мелдешке жалпысынан 15 олимпиадалык курама команда катышып, алар төрт тайпага бөлүштүрүлдү.

- В тайпасы: Кытай, БАЭ, Иран жана КЭДР;

- С тайпасы: Вьетнам, Өзбекстан, Филиппин жана Кувейт;

- D тайпасы: Түштүк Корея, Сауд Арабиясы жана Катар.

Эскерте кетсек, XX жайкы Азия оюндары 19-сентябрдан 4-октябрга чейин Япониянын Нагоя шаарында жана Айти префектурасында өтөт. Азия оюндарынын программасына 41 спорттун түрү, 68 дисциплина кирип, 460 медаль топтому ойнотулат.

Автор: Замира Ниязбекова