Саясат таануучу: “Иран Украина тарабынан жасалган соккуга жооп кайтарышы мүмкүн”

Түркиялык саясат таануучу Айдын Сезердин айтымында, Иран Каспий деңизиндеги соода кемесине жасалган чабуулга жооп катары Украинага тиешелүү же украин портуна багыт алган кемеге сокку урушу мүмкүн.

Ирандын Тышкы иштер министрлиги ишемби күнү Украина Ирандын соода кемесине аскердик чабуул жасаганын билдирген. Анын кесепетинен бир деңизчи каза болуп, дагы бири жаракат алган.

Сезердин пикиринде, бул окуя Каспий аймагында жаңы согуштун чыгышына алып келүү ыктымалдыгы төмөн. Бирок мындай аракеттер Ирандын айланасындагы чыңалууну күчөтүп, жаңы фронттун ачылышына түрткү болушу мүмкүн. Ал ошондой эле Украина бул соккуну өзүнүн ийгилиги катары көрсөтүүгө аракет кыларын белгиледи.

Эксперт Ирандын кандай жооп кайтарарын так айтуу кыйын экенин, бирок Кызыл деңизде же Ормуз кысыгына жакын аймакта Украинага тиешелүү же украин портуна бара жаткан кемеге ракеталык сокку жасалышы мүмкүн экенин айтты.

Ошондой эле ал бул окуя Украинанын аймак үчүн кооптуу оюн баштаганын көрсөтөрүн белгилеп, мындай аракет Киевдин өз демилгесиби же Батыштагы айрым өлкөлөрдүн чагымчылдыгыбы деген суроо жараларын кошумчалады.

Буга чейин Ирандын тышкы иштер министри Аббас Аракчи Орусиянын тышкы иштер министри Сергей Лавров менен телефон аркылуу сүйлөшүп, Ирандын коммерциялык кемесине жасалган чабуул жоопсуз калбай турганын билдирген.

Автор: Айзада Кыдырмышева