АКШдагы бороондон бир күндө 800 жол кырсыгы катталып, 13 адам набыт болду

АКШнын түштүгүндөгү бороондон 13 адам набыт болду. Алардын басымдуу бөлүгү аба ырайынын кескин өзгөрүшүнөн улам катталган жол кырсыктарына туш болушкан. Бул тууралуу 30-январда чет элдик басылмалар жазып чыгышты.

5 адам Алабамада жол кырсыгынан каза тапса, экөөсү Түндүк Каролинадагы кырсыкта көз жумган. 4 адамдын жансыз денеси Миссисиппидеги өрттөн кийин табылган. Өрт жылыткычты туура эмес колдонуудан улам келип чыккан.

АКШнын 6 штатында өзгөчө кырдаал киргизилди. 28-январь күнү бороондо 800дөн ашуун жол кырсыгы катталган.

Бийлик тарабынан 20 чоң жол жабылды. Саясатчылар адам өмүрүн алып кеткен кырсыктар боюнча жоопкерчиликти синоптиктерге тагышууда. Ал эми синоптиктер кардын катуу жаашы тууралуу алдын ала эскерткенин билдирүүдө.

Автор: Айпери Ганыжан кызы