Мугалимдер сентябрдын айлыгын толук алышат

Окуу жылы 15-сентябрда башталганына карабастан, мугалимдер сентябрдын айлыгын толук алышат. Бул маалыматты Агартуу министрлигинен тастыкташты.

Быйылкы окуу жылы 15-сентябрда башталып, 2027-жылдын 25-майында аяктайт. Мындай чечим Кыргызстанда Бүткүл дүйнөлүк көчмөндөр оюндарынын (31-августтан 6-сентябрга чейин) жана ШКУга мүчө мамлекеттердин саммитинин (31-август - 1-сентябрь) жана Эгемендүүлүктүн 35 жылдыгын (11-12-сентябрда) өткөрүлүшүнө байланыштуу кабыл алынды.

Мындан улам мектептердеги башталгыч класстар үчүн салттуу 5 күндүк окуу режими сакталат. Ал эми жогорку класстарга гана окуу жылынын ичинде кошумча 8 окуу ишембиси уюштурулат. Болжол менен айына бир гана жолу ишемби күнү сабак өтүлөт.

Быйылкы окуу жылындагы каникулдар, окуу пландарына кошулган жаңы өзгөрүүлөр тууралуу шилтемеден окуй аласыз.

Автор: Айжанар Рыспек кызы
Фото: интернеттен алынды