Бишкекте Көчмөндөр оюну менен ШКУга карата фан-зона уюштурулат

Дүйнөлүк көчмөндөр оюндарынын салтанаттуу ачылыш аземи жана Шанхай кызматташтык уюмунун саммити алкагында Ала-Тоо аянтында чоң фан-зона уюштурулат. Бул тууралуу Бишкек шаарынын мэриясы кабарлады.

Маалымдалгандай, анда борбор калаанын тургундары жана коноктору ачылыш аземди түз эфирден көрүп, майрамдык маанайга күбө боло алышат. Расмий түз эфир башталганга чейин кыргыз эстрада ырчыларынын жана чыгармачыл жамааттардын катышуусунда концерттик программа тартууланат. Ошондой эле фан-зонанын аймагында фуд-корттор, эс алуу жайлары жана үй-бүлөлүк эс алууга ылайыкталган башка аянтчалар иштейт.

Мындан тышкары, шаар тургундарынын ыңгайлуулугу үчүн борбор калаанын төрт районунда дагы 10 фан-зона уюштурулат. Жалпысынан Бишкек шаарында 11 аянтча иштеп, анда шаар тургундары жана коноктору 2026-жылдагы Дүйнөлүк көчмөндөр оюндарынын ачылыш аземин жана ШКУ саммитин көрө алышат.

Автор: Кылымбек Бейшеев