Ирак Сирия жана Түркияга жаңы мунай куурун курууну баштайт

Ирак жакын арада Сирия жана Түркия багытында жаңы мунай куурун курууну баштоону пландап жатат. Бул тууралуу өлкөнүн Мунай министрлигинин расмий өкүлү Салим ар-Рикаби билдиргенин чет элдик басылмалар жазышты.

Анын айтымында, жаңы Басра–Хадиса мунай кууру Түркиянын Жейхан портуна жана Сириянын Банияс шаарына чейин жетет. Долбоор Ирактын мунай экспортунун багыттарын диверсификациялоого багытталган.

1-августта Ирак менен Түркия Жейхан порту аркылуу ирактык чийки мунайды ташуу боюнча келишимге кол коюшкан. Документке ылайык, күнүнө кеминде 750 миң баррель мунай ташылат.

Ал эми 17-июлда Вашингтондо Ирак менен Сирия эки өлкөнүн ортосундагы мунай куурун калыбына келтирүү боюнча өз ара түшүнүшүү меморандумуна кол коюшкан.

Автор: Айзада Кыдырмышева