Астанада жасалма интеллект боюнча эл аралык олимпиада өтүп жатат

Кыргызстандын окуучулары 2-августтан 8-августка чейин Астана шаарында өтүп жаткан жасалма интеллект боюнча III эл аралык олимпиадага - IOAI-2026га катышууда. Жалпысынан мелдешке дүйнөнүн 106 өлкөсүнөн 500дөн ашык жогорку класстын окуучусу келген.

Катышуучулар жекече жана командалык сынактардан өтүп, жасалма интеллект моделдерин иштеп чыгышат. Ошондой эле компьютердик көрүү, табигый тилди иштетүү жана маалыматтарды талдоо багытындагы тапшырмаларды аткарышат.

Ачылыш аземинде Казакстандын президенти Касым-Жомарт Токаев өлкө санариптик өнүгүү багытын стратегиялык тандоо катары кабыл алганын билдирди.

"БУУнун Электрондук өкмөттү өнүктүрүү индексинде Казакстан 193 мамлекеттин ичинен 24-орунда турат. Жаңы технологияларды киргизүүгө даярдык деңгээли боюнча биздин өлкө Борбордук Азияда алдыда",- деди ал.

Президенттин айтымында, Казакстан жасалма интеллект мамлекеттик башкарууну, экономиканы жана бизнести өнүктүрүүнүн маанилүү куралы боло турган инновациялык экосистеманы түзүүдө.

Өлкөнүн стратегиясы мектеп олимпиадаларынан тартып университеттик программаларга, илимий изилдөөлөргө жана технологиялык стартаптарга чейинки кадрларды даярдоо системасын камтыйт. Казакстан алдыдагы беш жыл ичинде бир миллион адамды жасалма интеллектти колдонуу көндүмдөрүнө үйрөтүү максатын да койгон.

Муну менен катар республика эсептөө жана санариптик инфраструктурасын өнүктүрүүдө. Өлкөдө жасалма интеллект менен иштөөгө арналган суперкомпьютерлер пайдаланууга берилип, спутниктик интернетке жеткиликтүүлүк кеңейтилүүдө жана Эл аралык жасалма интеллект борбору ачылды.

Казакстан NVIDIA жана Firebird сыяктуу эл аралык технологиялык компаниялар менен кызматташтыкты өнүктүрүп, жасалма интеллект жаатындагы глобалдык күн тартибин түзүүгө да катышууда.

Ошол эле учурда негизги милдет — инвестицияларды туруктуу инновацияларга айландыруу. Бул үчүн күчтүү университеттер, илимий борборлор, венчурдук каржылоо жана квалификациялуу адистерди өлкөдө кармап калууга шарт түзүү зарыл.

IOAI 2026 олимпиадасын өткөрүү Казакстандын санариптик имиджин бекемдөөдө. Бирок стратегиянын ийгилиги өлкө жаштардын технологияга болгон кызыгуусун жана инфраструктурага жумшалган инвестицияларды жаңы изилдөөлөргө, өнүмдөргө жана технологиялык компанияларга айландыра алабы же жокпу — ошого жараша болот.

Автор: Айжанар Рыспек кызы