Касымалиев менен Оверчук Кыргыз-Орусия экономикалык форумунда "Евразиянын" иши менен таанышты

Министрлер кабинетинин төрагасы Адылбек Касымалиев жана Россия Федерациясынын өкмөтүнүн төрагасынын орун басары Алексей Оверчук VIII Кыргыз-Россия экономикалык форумунун алкагында «Евразия» АНОнун стендин көрүп чыгышты.

Стендде Кыргызстан, Россия жана Евразия мейкиндигиндеги башка өлкөлөрдүн ортосундагы кызматташтыкты өнүктүрүүгө багытталган гуманитардык, билим берүү, жаштар жана социалдык долбоорлор тааныштырылды. Ал жерде өзгөчө көңүл «Евразия» АНОсу Кыргыз Республикасында буга чейин ишке ашырып жаткан демилгелерге бурулду.

2025-жылдын август айында Бишкек шаарында үй-бүлөлүк эс алуу үчүн акысыз «Евразия» паркы ачылган. Долбоор «Евразия» АНОсу тарабынан жеке каражаттардын эсебинен ишке ашырылып, Россия менен Кыргызстандын достугунун символу жана Евразиялык экономикалык биримдиктин (ЕАЭБ) 10 жылдыгына арналган белек катары Кыргыз Республикасына өткөрүлүп берилген. Бүгүнкү күндө парк Борбор Азиядагы эң ири сейил бактардын бири болуп саналат. Ачылгандан бери аны бир миллиондон ашык адам барган.

2025-жылдын ноябрь айында Бишкекте Евразиялык орус тили, маданият жана инклюзия борбору ачылган. Ал аймакта орус тилин жайылтуу жана маданий-билим берүү кызматташтыгын өнүктүрүү боюнча негизги аянтча болуп саналат. Борбор Евразиялык орус тилин колдоо ассоциациясынын ишмердүүлүгүнүн алкагында иш алып барат.

Кыргызстанда социалдык дүкөндөр тармагы иштеп жатат. Анда пенсионерлер жана майыптыгы бар жарандар азык-түлүк жана биринчи зарылдыктагы товарларды өндүрүүчүлөрдүн баасы менен сатып ала алышат. Азыркы учурда Бишкек шаарында жана Чүй облусунда жалпысынан 7 дүкөн ачылган. Долбоор «Евразия» АНОсу менен Кыргыз Республикасынын Министрлер Кабинетинин ортосундагы кызматташтык жөнүндө макулдашуунун негизинде ишке ашырылууда.

Мындан тышкары, Россия менен Кыргызстандын бирдиктүү билим берүү мейкиндигин түзүү долбоору ишке ашырылууда. «Евразия» бул багыттагы жумушчу топту жетектеп, билим берүү системаларын интеграциялоо боюнча жол картасын бекиткен.

Россия-Кыргыз өнүктүрүү фондунун төрагасы Артем Новиков да уюм менен биргелешкен иштер тууралуу айтып берди. Анын айтымында, «Евразия» АНОсунун колдоосу менен Баткен облусунун Кадамжай районундагы мектептердин бирине жаңы китептер берилген. Учурда бул китептер билим берүү процессинде колдонулуп, окуучулардын билим алуу мүмкүнчүлүктөрүн кеңейтүүгө жардам берип жатат.

«Евразия» АНОсу Кыргыз-Россия экономикалык форумуна экинчи жыл катары менен катышууда. Форум мамлекеттик органдардын, бизнестин, өнүктүрүү институттарынын жана жарандык сектордун миңден ашуун өкүлдөрүн бириктирди. Үч күндүн ичинде экономикалык кызматташтыкты өнүктүрүүгө жана Кыргызстан менен Россиянын ортосундагы өнөктөштүк байланыштарды чыңдоого багытталган 30дан ашык келишимге жана меморандумга кол коюу пландалууда.