Бишкекте секелек кыздын алтын сөйкөлөрүн чечип алган аял кармалды (видео)

Бишкекте жашы жете элек кызды тоноого шектелип 21 жаштагы келин кармалды. Бул тууралуу борбор калаанын милициясы билдирди.

Маалыматка ылайык, окуя 2 күн мурун, тагыраагы, 12-августта көп кабаттуу үйлөрдүн биринин короосунда болгон. Шектүү 8 жаштагы кыздын кулагындагы алтын сөйкөлөрүн чечип алган. Уурдалган буюмдардын баасы 40 миң сомду түзгөн.

Бул факт боюнча Кылмыш-жаза кодексинин 206-беренеси (Тоноо) менен кылмыш иши козголгон. Шектүү убактылуу кармоочу жайга киргизилген.

Ал алтын сөйкөлөрдү кайсы жерге сатып жибергенин көрсөткөн. Сырганы сатып алган жарандар аны ыктыярдуу түрдө милиция кызматкерлерине өткөрүп беришкен.