Өкмөт башчы Ысык-Көлдөгү Дүйнөлүк көчмөндөр оюндарына даярдыкты текшерди

Министрлер кабинетинин төрагасы Адылбек Касымалиев Ысык-Көл облусуна болгон иш сапарында VI Дүйнөлүк көчмөндөр оюндарын өткөрүүгө даярдалып жаткан инфраструктуралык, туристтик, маданий жана спорттук объектилерди кыдырды.

Президенттик администрация билдиргендей, ал алгач Өрнөк айылындагы Курманжан датка атындагы Көчмөн цивилизация борборунун даярдыгы менен таанышты. Бул жерде эл аралык илимий конференция өткөрүлөт. Борбордун аймагына 16 скульптуралык композиция жана 7 кум скульптурасы орнотулган.

Ошондой эле Касымалиев Чолпон-Атадагы "Газпром" дене тарбия жана ден соолукту чыңдоо комплексин, ипподромдогу курулуш иштерин, ат спорту үчүн курулуп жаткан аренаны жана "Nomad" этнокомплексин көрүп чыкты.

Иш сапардын соңунда ал Кырчын жайлоосундагы даярдык иштеринин жүрүшү менен таанышты. Бул жерде этношаарча курулуп, аймак көрктөндүрүлүп, спорттук жана башка аянтчалар даярдалууда.

Касымалиев органдарга бардык иштерди өз убагында жана сапаттуу бүтүрүүнү, коопсуздукка, инфраструктурага жана конокторду жогорку деңгээлде кабыл алууга өзгөчө көңүл бурууну тапшырды.