Квота менен келген электромобилдерди мыйзамсыз өткөрүп берүү фактылары аныкталды

Квота менен Кытайдан алып келинген 5 электромобилди мыйзамсыз өткөрүп берүү фактысы аныкталды. Бул тууралуу 21-сентябрда Мамлекеттик бажы кызматынан билдиришти.

Маалыматка ылайык, электромобилдерди алып келүүдө жеңилдиктен пайдаланган Кыргыз жарандары тиешелүү бажы төлөмдөрүн төлөбөстөн Орусиянын жарандарына өткөрүп беришкен. Аныкталган 5 факт боюнча өлкө бюджетине 3 миллион 982 миң 274 сом өлчөмүндө материалдык зыян келтирилген.

ЕАЭБдин бажы мыйзамдарынын талаптарына ылайык, мындай транспорт каражаттарын Орусиянын жарандыгы бар же Орусияда туруктуу жашаган адамдарга өткөрүп берүүгө болбойт.