Спорт агенттигинин директору президенттен сыйлык алгысы келген спортчуну кабыл алды

Дене тарбия жана спорт мамлекеттик агенттигинин директору Урмат Асанбаев таяк тартыш боюнча спорт чебери Акылбек Урунбаевди жана башкы машыктыруучу Марат Раматовду кабыл алды.

Агенттик кабаралагандай, жолугушуу кечээ, 8-октябрда болгон. Урмат Асанбаев спортчуну жана башкы машыктыруучуну Кыргызстандын желегин эл аралык аренада татыктуу таанытып келе жаткандыктары үчүн Ыраазычылык кат менен сыйлаган.

Эске салсак, сентябрь айынын аягында Урунбаев таяк тартыш боюнча "Мистер Олимпиада" турниринде 95 килограмм салмакта жана абсолюттук салмак ченинде да чемпион болгон. Ал ошондо президент Садыр Жапаровдун колунан грамота алгысы келерин билдирген.