"Тамашоу": Жаштар курама командасы жаштыкты көрсөтсө, «No name» 70 жаштагы абышкалардын образын жаратышты

Бүгүн, 5-мартта Кожомкул атындагы Спорт Ордосунда «Тамашоу» Лигасынын Ак калпак кубогу үчүн таймашы өтүүдө. Мелдешке «Моника Беллуччи», «Тамадалар», «No name», «Патриоттор» жана «Тамашоунун» жаш оюнчуларынан куралган "Алга" тобунан турган 5 команда катышууда.

Саламдашууда "Алга" курама командасы "Жаштарды долларга окшотуу керек. Күтүүсүздөн көтөрүлүшү мүмкүн, бирок эч качан түшпөйт" деген ураан менен чыгышты. Ал эми «No name» курама командасы абышкалардын образын чагылдырышты. 5-сезондун жеңүүчүсү "Моника Беллуччи" тамашалары менен көрүүчүлөргө жагымдуу маанай тартууласа, орус улутундагы жигиттерден түзүлгөн "Патриоттор" командасы кыргыз тилинде тамашаларды аткарып, көрүүчүлөрдүн сүймөнчүгүнө айланышты. "Тамадалар" курама командасы кыргыздын улуттук баш кийимин кийип, калпак тууралуу ыр тартуулашты.

1-орунду жеңген команда Ак калпак кубогу жана 100 миң сом менен сыйланат. Калган орундарды ээлегендерге да акчалай байгелер берилет. Эң кызыгы, бул таймашта акыркы, 5-орунду алган командага 10 миң сом ыйгарылмакчы.

Автор: Айпери Ганыжан кызы