"9 жашар кызды зордуктаганга аракет кылып, өлтүрүп алган" деп кармалган шектүү кыздын тууганы болуп чыкты (окуя болгон жерден фоторепортаж)

Гүлира Турдукалиеванын жансыз денеси табылган кууш жер.

Окуя Чүй облусуна караштуу Жайыл районунун Кара-Балта шаарында болгон.

Ыкчам кылмыш иликтөө тобунун кызматкери окуя тууралуу көрсөтмө берип жатат.

Кылмышка шектүү Амантур Тургунбек уулу бөлөсүнүн кызын алгач таш менен башка уруп өлтүргөн.

Кыздын денеси жаткан жер канга боёлуп калган.

Гараж менен анын артына курулган дубалдын бир башы туюк болгондуктан, кыз качып кете албай калган.

Кыздын жансыз денеси табылган жер жана анын айланасы өтө ыплас жай болгон.

Сөөк бул гараждардын артынан табылган.

Кара-Балта шаарында каза болгон 9 жаштагы кыздын өлүмү боюнча экспертиза жүргүзүлгөн. Текшерүүнүн жыйынтыгында секелек кыз зордукталбай, бирок кыйнап өлтүрүлгөнү аныкталды. Бул тууралуу Жайыл РИИБинин башчысы Раад Мырзаканов билдирди.

Маалыматка ылайык, Кара-Балта шаарындагы Садовое көчөсүнөн табылган кыз 2005-жылы туулган Гүлира Турдукалиева экени аныкталган. Кылмышка шектүү катары маркум кыздын апасынын бөлөсү Амантур Тургунбек уулу кармалган.

“Окуя болгон күндүн эртеси, 16-мартта кылмышка шектүүнү ыкчам кылмыш иликтөө тобу шаардын четиндеги кашардан кармашты. Шектүүнүн үйүн тинтүү учурунда канга булганган шымы жана ыплас жерди баскан бут кийими табылды”,- деп билдирет Раад Мырзаканов.

Эске салсак, маркумдун жансыз денеси аталган шаардагы Социалдык фонддун имаратына тиешелүү гараждар менен дубалдын ортосунда жайгашкан кууш жана абдан ыплас жайдан табылган. Анын жанынан кан болгон таш табылып, укук коргоо кызматкерлери барганда кыздын денеси али муздай элек болгон.

Окуя тууралуу кененирээк маалыматты “Супер-Инфо” гезитинин 21-марттагы чыгарылышынан жана видео- материалын SUPER.KG порталынын “Супер ТВ” бөлүмүнөн көрө аласыздар.

Автор: Гүлжан Асанкожоева
Фото: Гүлжан Асанкожоева