Панфилов районунда "кызматтык абалынан пайдаланган" деп шектелген жетекчилерге кылмыш иши козголду

Чүй облусунун Панфилов районунда "кызматтык абалынан пайдаланган" деп шектелген жетекчилерге кылмыш иши козголду.

Маалыматка ылайык, аталган райондогу Ортоев айыл өкмөтүндө иштеген кызматкерлер 2013-жылдын октябрь айынан 2014-жылдын январь айына чейин "мектепке балаты, кооздук, керектүү нерселерди алдык" деп жасалма жол менен кассадан 193 500 сомду өздөштүрүп алышканы аныкталган.

Бул факты боюнча КРнын Кылмыш-жаза кодексинин 171-беренеси (мүлктү тартып алуу жана коротуу), 304-беренеси (кызматтык ишин кыянаттык менен пайдалануу) жана 315-беренеси (кызматтык жасалмалуулук) менен кылмыш иши козголду.

Ошондой эле Панфилов райондук маданият бөлүмүнүн кызматкерлеринин 2011-жылдан 2014-жылдын 1-январына чейин күйүүчү май, жүрбөгөн автоунаанын бөлүктөрүнө деп документтерди жасап, 53 877 сом өндүрүп алышканы белгилүү болгон.

Аларга карата КРнын Кылмыш-жаза кодексинин 304-беренеси (кызматтык ишин кыянаттык менен пайдалануу) жана 315-беренеси (кызматтык жасалмалуулук) менен кылмыш иши козголду. Башкы прокуратуранын басма сөз кызматы аталган кылмыш иштери боюнча иликтөө жүрүп жатканын маалымдады.

Автор: Динара Абдыкадырова