Ысык-Көл. Мамлекеттик сатып алуулардагы мыйзам бузуулар боюнча кылмыш иши козголду

Ысык-Көл облусун өнүктүрүү боюнча фонддун башкаруу дирекциясында мамлекеттик сатып алуулар боюнча мыйзам бузуу катталып, облустук прокуратура тарабынан кылмыш иши козголду.

Маалыматка ылайык, 2013-жылдын 26-июнунда дирекция тарабынан Жети-Өгүз районунун Саруу айылындагы көлмөлөрдө балык багуу боюнча тендер өткөрүлгөн. Ошол тендердик документтердин негизинде тендерге 1 миллион 614 миң сом сунуштаган жеке ишкер А.К. жана 1 миллион 600 миң сом билдирме менен «F.» ЖЧКсы катышкан.

Маалым болгондой, жеке ишкер А.К. аталган тендерге катышпаганы жана керектүү документтерге кол койбогондугу аныкталды. Ошондой эле тендер комиссиясы тарабынан 2013-жылдын 26-июнунда протокол түзүлүп, ошол эле жылдын 2-июлунда сатып алуулар жүргүзүлгөн. Жеңүүчү катары аз суммадагы каражат сунуштаган «F.» ЖЧКсы табылган.

2014-жылдын 18-мартында облустук прокуратуранын текшерүүсүнүн жыйынтыгы боюнча Ысык-Көл аймагын өнүктүрүү фондунун башкаруу дирекциясынын жетекчилерине карата КРнын Кылмыш-жаза кодексинин 304-беренеси (кызмат абалынан кыянаттык менен пайдалануу) жана 315-беренеси (кызматтык жасалмалуулук) боюнча кылмыш иши козголду. Учурда аталган кылмыш иши боюнча иликтөө иштери жүргүзүлүүдө. Бул тууралуу Башкы прокуратуранын басма сөз кызматы билдирди.

Автор: Перизат Музуратбекова