Бишкекте “Азербайжан – оттун өлкөсү” аталышындагы китеп көргөзмөсү өтөт

16-апрелде Бишкектеги КРнын Улуттук китепканасында “Азербайжан – оттун өлкөсү” аталышындагы китеп көргөзмөсү өтөт. Көргөзмөгө Азербайжан мамлекети тууралуу материалдар, азербайжандык авторлордун китептери, ар кандай фотодокументтер коюлат.

“Кыргызстан жана Азербайжан – боордош, терең тарыхый, маданий байланышы бар өлкөлөр. Алар илгертеден бери бири-биринин маданиятына жана адабиятына кызыгып келишет”,- деп билдиришет аталган китепканадан.

Уюштуруучулардын айтымында, иш-чарага КРнын расмий өкүлдөрү, Азербайжан жана Кыргызстандын парламент депутаттары, дипломатиялык корпус, эл аралык жана коомдук бирикмелер, маданият жана илим ишмерлери, массалык маалымат каражаттарынын өкүлдөрү, Чыңгыз Айтматовдун жакындары жана башкалар катышат.

Автор: Динара Абдыкадырова