Акыркы эки жылдын ичинде 200гө чукул кыргызстандык Орусиянын аскер кызматын өтөөгө ниетин билдирди. Бул тууралуу бүгүн, 16-апрелде орусиялык басылмалар Кыргызстандын эмгек мигранттарынын коомдук кыймылынын жетекчиси Алишер Маданбековго шилтеме берип жазып чыгышты.
Анын айтымында, кыргызстандык уландар Орусиянын жарандыгын алууга ишенүү менен Орусиянын аймагында аскер кызматын өтөөгө даяр. “Мыйзамга ылайык, алар акчалай жеңилдиктерди ала алышат”,- деди активист.
Эскерте кетсек, кечээ, 15-апрелде Орусиянын Коргоо комитети Мамлекеттик Думада “мигранттар Орусиянын жарандыгын алыш үчүн Орусиянын аймагында мөөнөттүү аскердик кызмат өтөшү зарыл” деп парламентке сунуш кыларын жарыялаган.