“Республика” фракциясынын лидери: “Лейлектеги газ түтүктөрүн жашоочулар сугат үчүн пайдаланууну суранышууда”

Жогорку Кеңештин 17-апрелдеги жыйынында депутат Назарали Арипов Баткендин Лейлек районундагы “Кыргызгазга” караштуу түтүктөргө байланышкан маселени көтөрүп чыкты. Айтымында, жергиликтүү эл ал түтүктөрдү дыйканчылык иштерге пайдаланууну суранышууда.

“Лейлек районундагы Жаңы-Жер айылынын Арка жана Борбордук аймактарынан 1960-жылдары 26 чакырым газ түтүгү өткөрүлгөн. “Кыргызгаз” ишканасы Орусияга сатылды, “Кыргызгаздын” “ТүштүкТрансГаз” ишканасы жараксыз болуп калган түтүктөрдү демонтаждоо иштери башталарын эскертип жатат. Бул түтүктөр өткөрүлгөн жерде 100 гектардан ашык айдоо аянты бар. Жергиликтүү тургундар ушул газ түтүктөрүн суу өткөрүүгө пайдаланууга берүүнү суранып жатышат. Анткени 100 гектардан ашык айдоо аянттарынын жер кыртыштары бузулуп, экологиялык жана материалдык зыяндарга учурап калуу коркунучу бар. “Кыргызгаз” тарабынан берилүүчү компенсациянын төлөмдөрүнө эл канааттанбайт. Элдин кызыкчылыгын баарынан жогору коюшубуз керек. “Кыргызгазда” азыр бул түтүктөрдү башка линиялар менен алып өтүүгө толук мүмкүнчүлүк бар”,- деди депутат.

Автор: Автандил Добулбеков