Бишкекте жол кырсыгына кабылган кичи автобустун айдоочусу ооруканада каза тапты

Кечээ, 21-апрель күнү жол кырсыгына кабылган Мерседес-Бенц Спринтер унаасынын айдоочусу ооруканада көз жумду. Бул тууралуу Бишкек ШИИББинин басма сөз кызматы бүгүн, 22-апрелде билдирди.

Маалыматка караганда, каза болгон жаран 1989-жылы туулган Руслан Мырсалиев болгон. Ал ооруканада ээсине келе албай көз жумду.

Айта кетсек, 21-апрель күнү саат 20:30 чамасында жол кырсыгы катталган. Анда 1989-жылы туулган Мырсалиев Русландын башкаруусундагы кичи автобус жол жээгиндеги электр мамысын сүзүп алган. Анын кесепетинен унаанын ичиндеги 25 жаштагы жүргүнчү кыз ошол жерден каза таап, айдоочу ооруканага жеткирилген эле.

Автор: Бекжан Рыскулов