Ош. Гүл сүйүүчүлөрү үчүн «Гүлдөр дүйнөсү» деген аталышта майрам уюштурулду

Ош мамлекеттик университетинин табият таануу жана география факультетинин ботаника, жалпы биологиялык дисциплиналар кафедрасы тарабынан «Гүлдөр дүйнөсү» деген аталышта акция уюштурулуп, анда бөлмө гүлдөрүнүн, икебаналардын (гүлдөрдү жасалгалоо боюнча япон искусствосу) көргөзмөсү болду. Бул тууралуу бүгүн, 22-апрелде окуу жайдын басма сөз катчысы Зинагүл Нуралиева билдирди.

Акцияны уюштуруучулардын бири Буниса Абдымомунова: «Ботаника, жалпы биологиялык дисциплиналар кафедрасында гүл өстүрүү ийрими иштеп, студенттерге гүл өстүрүүнүн жолдору, чыгармачылык менен икебана жасоо, дарактарды кыйыштыруунун жолдору адистер тарабынан үйрөтүлүп келет. Бүгүнкү иш-чарабыздын негизги максаты - гүл сүйүүчүлөргө гүлдөр тууралуу маалымат берүү, ийримде даярдалган икебаналардын көргөзмөсүн уюштуруу, окуу жайдагы гүл сүйүүчүлөрдү ийримге тартуу, ийримдин ишин көрсөтүү»,- деди.

Айта кетсек, табият таануу жана география факультетинде 21-апрелден 26-апрелге чейинки аралыкта илим жумалыгы өтмөкчү.

Автор: Айсана Паизова