УЕФАнын Чемпиондор Лигасы: “Атлетико” менен “Челси” 0:0 эсебинде тең ойношту

Фернандо Торрес башкы курамда чыгып, өзүн тарбиялаган "Атлетикого" каршы ойноду.

Оюндун экинчи бөлүгүндө борбордук коргоочу, "Челсинин" капитаны Жон Терри жаракат алып, майдандан кетүүгө аргасыз болду.

Оюндун алгачкы мүнөттөрүндө коноктордун дарбазачысы Пётр Чех жаракат алып, анын орду Марк Шварцер менен толукталды.

"Атлетиконун" лидери Диего Коста оюн эсебине өзгөртүү аракеттерин көп көргөнү менен, чабуулда ийгиликтүү боло алган жок.

УЕФАнын Чемпиондор Лигасынын жарым финалынын алгачкы оюнунда кечээ, 22-апрелде мадриддик “Атлетико” өз үйүндө лондондук “Челси” менен беттешип, 0:0 эсебиндеги тең чыгуу катталды.

Мадриддик клуб оюндун жүрүшүн толук көзөмөлгө алганы менен, өз мүмкүнчүлүктөрүн пайдалана алган жок. Ал эми “Челсинин” оюнчулары дарбазаны кургак сактоого туураланган ыкмада ойноп, толук бойдон коргонууда ойношту.

Кошумчалай кетсек, бул командалар 2 оюндун жыйынтыгы менен Чемпиондор Лигасынын финалчысын аныкташат. Жооптук оюн 30-апрелде Лондондо өтөт.

Автор: Максат Кудайбердиев