Бишкекте "Тазалык" муниципалдык ишканасынын кызматкери пара алып жаткан жеринен кармалды

Бишкекте "Тазалык" муниципалдык ишканасынын кызматкери пара алып жаткан жеринен кармалды. Бул тууралуу ИИМдин басма сөз кызматы бүгүн, 29-апрелде билдирди.

Укук коргоо органдарына жеке ишкер кайрылып, Бишкек мэриясынын Санитардык-экологиялык инспекциясынын кызматкери деп тааныштырган адам кетирилген катачылыктарга айып салуу менен опузалап, акча бере тургандай абалга келтирип жатканын маалымдаган.

Атайын жүргүзүлгөн иш-аракеттердин натыйжасында "Тазалык" муниципалдык ишканасынын абоненттик кызматынын инспектору 6 миң сом пара алып жаткан жеринен кармалган. Аталган факт боюнча "опузалап пара талап кылуу" деген шек менен кылмыш иши козголду.

Автор: Мирлан Өмүралиев