Ошто 2014-жылдын ажылык сапарына арналган жыйын өттү

Кечээ, 4-майда Ош облустук мусулмандар казыятында 2014-жылдын ажылык сапарын уюштуруу боюнча жыйын болуп өттү. Бул тууралуу КРнын Муфтиятынын басма сөз кызматы билдирди.

Маалым болгондой, жыйындын негизги максаты быйылкы ажылык сапарды уюштуруунун тартиптери тууралуу жалпыга маалымдоо болду. Иш-чарага муфтийдин орун басары, ажылык боюнча республикалык штабдын төрагасы Замир ажы Ракыев, ажылык жана умра боюнча башкы адис Марат ажы Юсупов, ажылык жана умра бөлүмүнүн катчысы Эсен ажы Өмүракунов, Ош облусунун мусулмандарынын казысы Ниязали ажы Арипов жана Ош облусуна караштуу бардык райондордун имам хатиптеринин жана Ош облустук казыяттын кызматкерлери катышышты. Жыйынга Ош облусунун күч органдарынын өкүлдөрү да чакырылды. Эскерте кетсек:

- Быйылкы жылы Кыргызстанга 3685 квота бөлүнүп, анын 3560 квотасы элге даярдалган. Анын 738 квотасы Ош облусуна бөлүнгөн;

- Быйылкы ажылык сапардын жалпы баасы 2400 АКШ долларына барабар;

- Ажыга баруучулар чүчү кулак аркылуу тандалып, каттоонун баасы 500 сомго тең. Быйыл биринчи жолу бара турган жарандар чүчү кулакка катышып каттала алышат;

- Каттоо иштери 2014-жылдын 12-майында саат 9:00дө башталып, 12-июнь күнү саат 18:00гө чейин өтөт.

Автор: Нургазы Аматов