“Мамлекеттик органдар документ иштерин кыргыз тилинде жүргүзсүн” дегенге президент Алмазбек Атамбаев макул эмес

Молдакун Абдылдаев, президенттин Жогорку Кеңештеги өкүлү

Кыргыз тилин өнүктүрүү боюнча мыйзамга билдирген президенттин каршы пикири парламенттин жалпы жыйынында талкууланат. Мындай чечим бүгүн, 6-майда ЖКнын Билим берүү, илим, маданият жана спорт комитетинде кабыл алынды.

Айта кетсек, мыйзамды Жогорку Кеңеш 2013-жылдын июнь айында кабыл алган. Ал мамлекеттик тилди өнүктүрүүгө багытталган. Бирок президент Алмазбек Атамбаев мыйзамда Конституцияга карама-каршы келген нормалар бар экенин айтып, документке кол койгон эмес. Аны кайра иштеп чыгуу үчүн артка кайтарган эле.

Комитет жыйынында президенттин ЖКдагы өкүлү Молдакун Абдылдаев буларды айтты:

“Бул мыйзам долбоору башка мыйзамдарга каршы келерин айтып, каршы пикир билдирген. Макулдашуу комиссиясы түзүлүп, талкуулар жүрдү. Бирок мыйзам долбоорундагы “мамлекеттик органдар, жергиликтүү өзүн-өзү башкаруу органдары документтерди мамлекеттик тилде даярдайт жана кабыл алат” деген жобосу боюнча макулдаша алган жокпуз. Бул “Расмий тил жөнүндө” мыйзамга каршы келет”.

Автор: Автандил Добулбеков