Социалдык өнүгүү министри эл аралык бала асыроо укугуна ээ болгон уюмдарга сертификат тапшырды

Эл аралык бала асыроо боюнча уюмдарга аккредитациядан өткөндүгүнө байланыштуу сертификат тапшырып жатып социалдык өнүгүү министри Кудайберген Базарбаев "Кыргызстанда эл аралык бала асыроо боюнча чечимди бир гана сот кабыл ала алат" деп билдирди. Бул тууралуу 13-майда аталган мекеменин басма сөз кызматы маалымдады.

"Эл аралык бала багып алуу укуктук нормалардын чегинде болушу үчүн министрлик бала асыроо менен алектенген уюмдарды каттоонун жоболоруна өзгөртүүлөрдү киргизди. Коррупциялык элементтер жокко чыгарылып, аз сандагы уюм аккредитацияланды",- деди министр.

Ал өлкөдөгү улуттук бала асыроо приоритет бойдон каларын айтып, ошол эле учурда Кыргызстанда үй-бүлө табылбаса, чет өлкөдөн үйлүү болууга укугу бар экенин кошумчалады.

Балдарды коргоо боюнча башкармалыктын жетекчиси Марина Жапаркулованын айтымында, мамлекеттик маалымат банкында 167 бала бар. Алардын басымдуу бөлүгу психикалык жактан жабыркагандар жана ден соолугунун мүмкүнчүлүгү чектелгендер. Бала асыроо укугун алуу үчүн 17 компания арыз берип, алардын ичинен 7 уюмга сертификат берилди.

Автор: Айпери Ганыжан кызы