Ошто “Жол эрежелерин сактайлы” деген аталышта акция уюштурулду

Ош мамлекеттик университетинин Жаштар комитети тарабынан Ош шаарынын борбордук көчөлөрүндө “Жол эрежелерин сактайлы” деген аталышта акция уюштурулду. Бул тууралуу бүгүн, 15-майда окуу жайдын басма сөз кызматы билдирди.

Ага ОшМУнун 6 факультетинен 600дөн ашуун студент катышып, жөө жүрүүчүлөрдү жол эрежесин сактоого, атайын белгилерден, жол чырактын жашыл чырагы жанганда өтүүгө үндөштү. Айрым жол эрежесин бузган айдоочуларга, шаар тургундарына жол-кайгуул кызматкерлери менен биргеликте түшүндүрүү иштерин жүргүзүштү.

“Бул акциянын негизги максаты шаар тургундарын жол эрежесин сактоого үндөө, кырсыктардын алдын алуу, жаштардын, коомчулуктун көңүлүн буруу болуп саналат. Иш-чараны Ош шаарынын жаштар иштери боюнча комитети менен биргеликте өткөрүп жатабыз”,- деди ОшМУнун Жаштар комитетинин төрагасы Абылкасым уулу Канат.

Автор: Айсана Паизова
Фото: ОшМУнун басма сөз кызматы