Кудайберген Базарбаев Бишкекте гендердик саясат тармагындагы приоритеттерди иштеп чыгуу боюнча форум өткөрүүнү сунуштады

Социалдык өнүгүү министри Кудайберген Базарбаев БУУнун Европа жана Борбордук Азия мамлекеттериндеги Аялдар бирикмесинин өкүлү Ингеборг Гисладоттир менен жолугушуу учурунда Бишкекте гендердик саясат тармагындагы приоритеттерди иштеп чыгуу боюнча Борбордук Азия форумун өткөрүүнү сунуштады. Бул тууралуу 15-майда аталган мекеменин басма сөз кызматы билдирди.

Министр Кыргызстанда гендерлик мыйзам, статистика жана аялдардын лидер болушун колдогон институттук механизм иштелип чыкканын айтты.

"Кыргызстан алгачкы жолу 2020-жылга чейин гендердик теңдикти камсыз кылуу үчүн Улуттук стратегияны кабыл алды. Аялдардын, эркектер жана балдардын укугун коргоо максатында бардык чаралар көрүлүүдө. Үй-бүлөдөгү зомбулук бир гана үйгө тиешелүү көйгөй болбостон, азыркы тапта коомчулук бул маселе менен күрөшүүдө. Кыргызстан гендердик саясатты ишке ашыруу боюнча лидерлик сапта турат. Жогорудагы форум Борбордук Азия өлкөлөрүн бириктирген импульс болуп калмак",- деди Базарбаев.

Өз кезегинде Ингеборг Гисладоттир Кыргыз Республикасы гендердик теңдик тармагында алгылыктуу иштерди жасаганын белгилеп өттү.

Автор: Айпери Ганыжан кызы