Нарында тамакка ууланып ооруканага түшкөн 32 жарандын 15и ооруканадан чыгарылды

Нарын районунун Куланак айылында тамакка ууланып ооруканага жаткырылган 32 тургундун 15инин абалы жакшы болгону байкалып, ооруканадан чыгарылды. Бул тууралуу бүгүн, 21-майда Саламаттыкты сактоо министрлигинин басма сөз кызматынан билдиришти.

Маалыматка ылайык, тиешелүү текшерүүлөрдөн улам уулануу тамак-ашка кошулган майонезден эмес, эт тарткан адамдан же малдагы сальмонеллёз инфекциясынан улам болгон.

Эске салсак, Нарын районунун Учкун айыл аймагындагы Куланак айылында 13-майда ата-энесине куран окуткан Орозбек Исаковдун үйүнө 50гө жакын адам чакырылган. Анын ичинен 32си өзүн начар сезгендиктен, "ууланды" деп ооруканага жаткырылган.

“Чакырылгандарга муздак эт тартышкан. Аталган инфекция эт тартып жаткан же бузуп жаткан жаранда, же болбосо мал жандыкта болгон. Азыр ооруканага түшкөн жарандардын абалдары жакшы”,- деп белгилешет министрликтен.

Автор: Мальвина Уметбекова