Бүгүн, 27-майда Чүй
облустук сотунда 3,5 жылдан бир чечим чыкпай жаткан адам өлтүрүү фактысы
боюнча сот отуруму болду. Анда жарыш сөздөр айтылды.
Эске сала кетсек, 2010-жылдын 6-апрель күнү эртең
менен Токмок шаарынын 1-кичи районунда мыкаачылык менен өлтүрүлгөн Рабига
Жумабаеванын жансыз денеси табылган. Бул адам өлтүрүү фактысына шектүү делинип
1988-жылы туулган Урмат Аскеев, 1990-жылы туулган Алишер Жумашев, 1992-жылы
туулган Шахида Аманбаева кармалган. Мына ошондон бери айыпталуучулар абакта
соттун өкүмүн күтүп келишет. Буга чейин 2013-жылдын 12-декабрында Токмок шаардык
соту жогоруда аты аталган айыпталуучуларды актаган. Бирок ал чечимге макул болбогон
жабырлануучунун атасы доо арыз менен кайрылган. 2014-жылдын 20-май күнү Чүй
облустук соту апелляциялык арызды карап, мамлекеттик айыптоочунун сунушу менен
сот отуруму 27-майга жылган болчу.
Бүгүнкү сот отурумунун жүрүшүнөн:
Б.Догдурбеков, мамлекеттик
айыптоочу:
- Тергөөнүн жүрүшүндө айыпталып жаткан Урмат Аскеев, Алишер
Жумашев, Шахида Аманбаеванын күнөөсү толугу менен далилденген. Тартылып алынган
видеодо Аманбаева окуя кандайча болгонун көрсөтүп берип жатат. Биринчи
инстанциядагы соттун чечими мыйзамсыз чыккан. Урматтуу судьялар, 2013-жылдын
12-декабрында чыккан өкүмдү жокко чыгарып берсеңиздер. “Адам өлтүрүү” беренеси
боюнча күнөөлөнүп жаткан Урмат Аскеев үй-мүлкүн конфискациялоо менен 16 жылга,
ал эми “адам өлтүрүүгө катыштыгы бар” деп күнөөлөнүп жатышкан Алишер Жумашев
менен Шахида Аманбаева үй-мүлкүн конфискациялоо менен 13 жылга эркинен
ажыратылсын.
Сыдык Жумабаев, каза болгон Рабига Жумабаеванын атасы:
- Мамлекеттик айыптоочуну колдойм. Өткөн сот
процесстеринде Шахидага бир канча суроо берейин дегем. Бирок ал жооп бере
албады. Мен кызымды өлтүргөн адамды көргүм келет. (Ред. айыпталуучуларга карап) силер
ачык айтпай, жашырып жатасыңар. Ким өлтүргөнүн айтып койгула, жаштык кылып
жатасыңар. Урматтуу судьялар, жакшылап карап, бир чечим чыгарып бергиле. Менин
кызым да көрүндө тынч жатсын. Кан коё бербейт.
Фемида Жумабаева, каза болгон Рабига Жумабаеванын
эжеси:
- Рабига менен Урмат үйлөнөбүз деп жатышкан. Ал мага Шахида
деген кыз менен жаман болуп жүргөнүн айткан. Менин Урмат Аскеевде доом жок. Шахида
Аманбаева менен Алишер Жумашевди шектүү деп жатам. Болгону туура, адилет өкүм
чыгарып берсеңиздер.
Асыл Тагаева, айыпталып жатышкан Алишер Жумашев менен
Урмат Аскеевдин жактоочусу:
- Тергөө учурунда көп кемчиликтер кеткен. Суралган 32
күбөнүн бири да окуяны көргөн эмес. Урматтуу
судьялар, адилет өкүм чыгарып бересиздер деген ишеничтебиз.
Күмүшбек Ыбыкеев, айыпталып жаткан Шахида Аманбаеванын
жактоочусу:
- Айыпталуучулар каза болгон Рабига Жумабаевага душман
эмес болушчу. Урмат Аскеев үйлөнөм деп жүргөн жигити, Алишер Жумашев коңшусу,
Шахида Аманбаева дос кызы болгон. Бул жерде эч кандай кылмыштын мотиви жок. Алардын
күнөөсү тергөө тарабынан такталган эмес. Күбөлөрдүн баары “шекшийбиз” дешкен. Жумабаеваны
ким өлтүргөнүн эч ким көргөн эмес. “Шекшиймин” деген сөз далил болуп бере
албайт. Тергөө начар, сапатсыз тергелген. Тергөөчү Өмүралиевге тийиштүү баа
берилет деп ишенем. Биз биринчи инстанциядагы соттун чечимин күчүндө калтырсын
деп жатабыз.
Алишер Жумашев, айыпталуучу:
- Жактоочумду колдойм. Туура чечим чыгарып берсеңиздер.
Шахида Аманбаева, айыпталуучу:
- Мен да жактоочуну колдойм.
Жарыш сөздөр айтылган соң, соттук коллегия акыркы чечим
чыгаруу күнүн 29-майга белгилешти.
