Дипломатиялык паспортту колдонуу эрежесин бузган аткаминерлерге жаза күчөтүлмөкчү

Кыргызстанда дипломатиялык жана кызматтык паспортту берүүдө, колдонууда жана кайтарып берүүдө мыйзам бузгандарга карата жазаны күчөтүү маселеси каралууда. Тийиштүү мыйзам долбоору бүгүн, 28-майда ЖКнын жыйынында каралууда. Тышкы иштер министринин орун басары Эринес Оторбаев көпчүлүк аткаминерлер кызматтан кеткенден кийин деле дипломатиялык паспортун мекеменин кадрлар бөлүмүнө тапшырбай колдонуп жүрүшкөнүн айтты. Мыйзам долбоору менен кызматкер иштен бошотулгандан кийин диппаспортун тапшырбаса, 4 миңден 10 миң сомго чейин айып салынат.

Депутат Исмаил Исаков бул мыйзам кабыл алынганы менен, баары бир иштебей турганын айтты. Ал эми депутат Ыргал Кадыралиева "Жарандык паспортун албай, дипломатиялык паспорту менен иш сапарга чыккандар болушу мүмкүн. Алар өлкөгө кайтып келгенден кийин гана паспортун жокко чыгаралы. Айрым кызматкерлер иш сапарында жүргөн учурда кызматтан алынып калынууда" деп билдирди.

Автор: Автандил Добулбеков