Орусияда "кыргызстандык жаранды темир союл менен 14 жолу чаап өлтүргөн" деп шектелген тажикстандык жарандын иши прокуратурага жөнөтүлдү

"Кыргызстандык жаранды темир союл менен 14 жолу чаап өлтүргөн" деп шектелген тажикстандык жаранга карата козголгон кылмыш иши аяктады. Бул тууралуу орусиялык басылмалар бүгүн, 2-июнда жазып чыгышты.

Маалыматтарга караганда, 2013-жылдын декабрь айында Москва шаарынын Блюхер көчөсүндөгү үйлөрдүн биринде 47 жаштагы кыргызстандык жаран менен 24 жаштагы тажикстандык жаран уруша кетишкен. Жыйынтыгында тажикстандык жаран кыргызстандык жаранды 14 жолу темир союл менен башка чаап сабаган. 47 жаштагы кыргызстандык жаран окуя болгон жерде каза болгон. Ал эми анын өлүмүнө шектүү жаран жабырлануучунун үйүнөн 16 миң рублга бааланган буюмдарын уурдап кеткени айтылган.

Кийин тажикстандык жаран полиция тарабынан кармалып, убактылуу кармоочу жайга камалган. Учурда ага карата козголгон кылмыш иши аяктап, иштин сотто каралышы үчүн прокуратурага өткөрүлүп берилгендиги белгилүү болду.

Автор: Мирлан Өмүралиев