Эркингүл Иманкожоева: “Мөңгүлөр жөнүндө” мыйзамды президентке бурмалап жеткиришти, ошол үчүн кол коюлбай калды”

“Жогорку Кеңеш кабыл алган мөңгүлөр жөнүндө мыйзамды президенттик аппараттын бөлүм жетекчилери мамлекет башчыга бурмалап жеткиришти деген ойдомун. Жыйынтыгында президент бул мыйзамга кол коюудан баш тартты”,- деп билдирди SUPER.KG порталына депутат Эркингүл Иманкожоева. Депутаттын билдиришинче, бул мыйзам жакын арада кайрадан парламентте каралат.

“Мыйзам кабыл алынса, “Кумтөрдө” иш токтойт деген туура эмес. Анткени мыйзам артка иштебейт, алдыда кен казуу аянты кеңейсе, жер астынан казуу ыкмасына өтүшү шарт. Мыйзамды даярдоодо министрликтин өкүлдөрү, адистер, экологдор катышып, баары эске алынган. Жогорку Кеңеште кайра каралса, президенттин каршы пикирин аттап өтүшүбүз керек”,- деп билдирди Иманкожоева.

Эске салсак, 31-майда президент Алмазбек Атамбаев парламент жакында кабыл алган “Мөңгүлөр жөнүндө” мыйзамга кол койбой, кайрадан Жогорку Кеңештин кароосуна жөнөткөн. Каршы пикир билдирүү төмөнкү аргументке негизделген болчу:

“Мыйзамды кайтарып берүүнүн негизги себеби - Жогорку Кеңеш “КРнын Өкмөтү жөнүндө” конституциялык мыйзамды бузгандыгы. Тактап айтканда, мамлекеттик бюджеттин эсебинен жабыла турган чыгымдарды көбөйтүү же анын киреше бөлүгүн кыскартуу каралган мыйзамдардын долбоорлоруна расмий корутунду бериши үчүн өкмөткө алдын ала кайрылуу жөнөтүлгөн эмес. Мыйзамдын күчүнө кириши менен бюджетке келип түшчү каражаттардын кемиген бөлүгүн каржылоонун булагы тууралуу өкмөттүн расмий корутундусу талап кылынышы керек эле.

Бул мыйзам бюджеттин каражаттары кемишине алып келери шексиз, себеби сунушталган мыйзамда мөңгүлөрдө, кар күрткүлөрүндө жана көп жылдык тоң таралган зонада пайдалуу кен чыккан жерлерди ачык ыкма менен иштетүүгө тыюу салынат. Демек, мыйзамга ылайык, азыр иштеп жаткан кен казуучу ишканалар жер алдында иштөөгө өтүүгө тийиш. Ал үчүн казып чыгаруу ыкмасын кайрадан өзгөртүү максатында жумуштарын токтотууга милдеттүү болот. Мындай жагдай кен иштетүүчү ишканалардын кирешесин азайтып, чыгашаларын көбөйтөт, демек, алар салыкты төлөбөй турууга мажбур болот. Ошентип, мамлекет милдеттүү төлөмдөрдөн жана салыктардан пландаштырылган киреше албай калат”.

Автор: Автандил Добулбеков