Табылды Акеров, серепчи: “Алайдагы митингчилер саруулуктардай абалда калышы мүмкүн"

"Алайда жол тоскондор ар кандай бөлүп-жаруулардан кийин саруулуктардай ара жолдо калышы мүмкүн”, - дейт саясат талдоочу Табылды Акеров бүгүн, 4-июнда SUPER.KG порталына.

Айтымында, Алай элинин акциясынын башка аймактарга да жайылып кетүү коркунучу болсо, анда бийлик алар менен сүйлөшүүгө барышы ыктымал.

“Бийлик Ахматбек Келдибековдун тарапташтары өтө деле чоң көйгөй жарата албайт десе, анда алардын талаптарын укпайт. Бийлик Ахматбек Келдибековду абактан чыгарууга кызыкдар эмес. Ошондуктан "анын тагдырын сот гана чечет" деген позицияны карманышат”.

Эскерте кетсек, Алай районунда абакта жаткан депутат Ахматбек Келдибековдун боштондугун талап кылып чыккан тургундар 27-майдан бери Ош - Эркеч-Там унаа жолун бууп турушат.

Автор: Жамалидин Парманкулов